Objekti në fjalë është një vilë individuale dykatëshe, e vendosur në një truall me sipërfaqe rreth 1000 m² dhe në një terrën me pjerrësi të theksuar. Koncepti arkitektonik është zhvilluar mbi parimin që çdo faqe e godinës të orientohet dhe të marrë dritë natyrale sipas kërkesave të investitorit, duke siguruar kështu ndriçim dhe pamje optimale në çdo drejtim.

E gjithë struktura është pozicionuar në krye të parcelës, duke përfituar panoramën dhe ekspozimin më të mirë. Aksesimi në objekt realizohet nga kuotat më të ulëta të terrenit, gjë që ka mundësuar vendosjen e ambienteve ndihmës dhe të shërbimit (magazinim, lavanderi, teknike, etj.) në katin përdhe, i cili në pjesën ballore mbetet i hapur dhe i ndriçuar nëpërmjet çarjeve vertikale dysheme–tavan.

Katet e sipërme, të dedikuara për banim, janë organizuar në mënyrë funksionale duke garantuar komoditet, privatësi dhe ndriçim natyral në çdo hapësirë.

Fasadat karakterizohen nga një kompozim bashkëkohor që ndërthur sipërfaqe të pastra me grafiato të bardhë me pjesë të veshura me pllaka natyrale, si dhe vetrata të mëdha xhami që lejojnë integrimin vizual të brendësisë me mjedisin e jashtëm. Kjo qasje i jep objektit një pamje moderne dhe të lehtë, duke ruajtur gjithashtu ndjesinë e harmonisë me terrenin.